ДЗЕСЯЦЬ СОТАК
-
Дзесяць сотак
На дачы ты
Працуеш у ахвотку,
Да сэрца менш
Палітыку прымаеш.
І прымеш іншым разам
Менш на “сотку”,
Таму што ўласных
Дзесяць сотак маеш. -
Дачнiк-тэарэтык
– У працы дачнай
Я вельмі лоўкі,
І знаю ўсю яе
Дазвання.
Вы дайце толькі мне
Ад рыдлёўкі
Пульт дыстанцыйнага
Кіравання. -
Каларадскi жук
Жук каларадскі
Бульбу аб'ядае
Ў Кузьмы на дачы –
Тая вяне, сохне.
І ён яе
Садзіць больш не жадае:
– Хай шкоднік-жук
Ад голаду падохне!.. -
Фауна i флора
Дзякуючы саду,
Агароду,
Лепш стаў ведаць
Матухну-прыроду:
З фауны –
Мне больш вядомы крот,
З флоры –
Болей пырнік і асот. -
Бананы
Як дачнік
Вельмі апантаны,
Вядомы ўсім
Наўкруг Лаўрэн.
Дык вось:
Пасеяў ён бананы,
Але чамусьці
Вырас хрэн.