ЛІТАРАТУРНЫ ФРОНТ
-
Лiтаратурны фронт
Не краналі мяне
Палітычныя буры,
Бо быў недаспадобы
Публічны афронт.
Я збіраўся адседзецца
Ў літаратуры –
Ды й па ёй ад нядаўна
Праходзіць стаў фронт. -
Падзел сярод паэтаў
Ну, хто паэтаў
Зразумее?
У кожнага
Ёсць свая ніша:
Палова з іх
Пісаць не ўмее,
Другая ж частка іх –
Не піша. -
Папулярнасць
Паэта гэтага
Вазьмі ты –
Усюды ён
Вядомасць мае,
І ўжо ж настолькі
Знакаміты,
Што нават трасца
Яго знае!.. -
Жонка паэта
– Ведайце, бабы:
Паэты – маньякі.
Мой муж – паэт,
Дык адкрыю сакрэт:
Можаш казаць,
Што як муж ён – ніякі,
Ды баронь Бог –
Што такі ж і паэт!.. -
Муж паэтавай жонкi
Каханая!
Як разумею я гэта!
Але не парушыць
Ужо завядзёнкі:
Няўдзячная справа –
Быць жонкай паэта.
А мне як:
Быць мужам паэтавай жонкі?!.