СВЕТЛАЯ СУЧАСНАСЦЬ
  • Светлая сучаснасць На злосць і зайздрасць
    Загніваючым буржуям
    Мы дружна будучыню светлую
    Будуем.
    Але нарэшце
    Ці ўнясе хто яснасць:
    Калі ж мы возьмемся
    За светлую сучаснасць?..
  • Саюз Сябры!
    Цудоўны быў Саюз!
    Ды з ім у нас
    Якісь канфуз:
    Пакуль ён
    Не распаўся –
    Нам так
    Не падабаўся!..
  • Загранiца Пісаў калісьці
    Літаратар:
    „Да цёткі, ў вёску,
    Ў глуш, ў Саратаў!..”
    І трэба ж так
    Жыццю змяніцца:
    Вось і Саратаў –
    Заграніца!..
  • Памяркоўнасць Памяркоўнасць
    Можа загубіць,
    І мы самі
    Ў тым сабе падсобім:
    Памяркуем часам,
    Што рабіць,
    Але так нічога
    І не зробім.
  • Народ i ўрад Урад жадаў бы,
    Каб народ
    Глядзеў яму
    Заўсёды ў рот.
    Але народ
    Упарта хоча
    Хоць раз зірнуць
    Ураду ў вочы.