КАРЫСНАЯ ПАРАДА
-
Карысная парада
Начальніка
Крытыкаваць –
Нібы тыгрыцу
Цалаваць.
Бо страху многа
Тут і там,
Задавальнення ж –
Ні на грам. -
Не губляйце галавы!
Калі часам
Затужылі вы
Ад праблем
І спраў беспаспяховых –
Не губляйце, хлопцы,
Галавы,
Бо і так да чорта
Безгаловых! -
Дзве бабы
Ты з жонкай, братка,
Бабаю не будзь,
Бо ў гэтай справе
Прэцэдэнты маюцца:
Такія сем'і
Доўга не жывуць –
Дзве бабы ў адной хаце
Не ўжываюцца. -
Нясi свой крыж
За цуглі
Наравісты лёс бяры,
Трымай уладу
Над самім сабой,
І лепей сам нясі
Свой цяжкі крыж,
Чым панясуць яго
Перад табой. -
Манцiроўка
Па вуліцы йдучы вячэрняй,
Воўку
Пачаў вучыць
Больш вопытны Панас:
– Калі ў руцэ
Трымаеш манціроўку –
Дык менш пытаюцца:
„Каторы час?”