БАБЫ І МАЛАДЗІЦЫ
-
Бабы i маладзiцы
Калі жанчына
Маладзіцца –
Яна завецца
Маладзіца,
Калі ж выходзіць гэта
Слаба –
Тады яна
Завецца баба. -
На папраўку
– Каб пахудзець,
Я села на дыету, –
Яніна кажа
Свату свайму Саўку.
– Як вынікі? –
Пытае той кабету.
– Пайшлі, як кажуць,
Справы на папраўку… -
Як выглядае кабета?
Дзіўнага
Ёсць шмат на свеце –
Не уцяміш
Нізашто:
Сорак стукнула
Кабеце –
Выглядае ж
На ўсе сто!.. -
Мужыкi ў пячонцы
– Як жанчына нашая
Жыве? –
Цётка Мар’я
Гаварыла Нонцы. –
У дзяўчыны
Хлопцы ў галаве,
А ў замужняй –
Мужыкі ў пячонцы. -
Не туды трапляем
Як часта,
Стрэўшы маладзіцу,
Што так
Прываблівае нас,
Мы марым
Трапіць пад спадніцу,
А пападаем
Пад абцас.