Душа і галава

Яна не просіць есці, піць,
Аднак у кожнага бывае:
Душа то раптам забаліць,
А то чамусьці заспявае.
Павел Саковіч

Чаму, рабяты,
Так бывае,
Чаму над намі
Доля кпіць:
Як звечара
Душа спявае –
Дык зранку
Галава баліць?..

Гадзюка

Дабро б мне рабіць і рабіць,
Ды зло адступаць і не мусіць...
Убачыш гадзюку – не бі:
Цябе нехта іншы укусіць.
Алег Салтук

Па розуму, братка,
Рабі,
Бо зло адступаць
І не мусіць:
Убачыш гадзюку –
Не бі:
Мо, нейкага гада
І ўкусіць!..

Дазваляйце сябе любіць

Не раблю адкрыцця выключнага,
Проста хочацца нагадаць:
Між турботаў жыцця балючага
Дазваляйце сябе кахаць.
Надзея Салодкая

Бабы,
З тым цырымоніцца нечага!
Важна толькі
Спрыт не згубіць!
Ранкам, днём,
Асабліва – вечарам,
Дазваляйце сябе
Любіць.

Гадзіла

Я іду напрасцяк,
я хрыбты хрызантэмам крышу...
Таццяна Сівец

Я іду гэтаксама,
Як недзе хадзіла Гадзіла,
Я іду напрасткі,
Я хрыбты ўсім сустрэчным крышу!
Ты грахі мне прабач,
І даруй мне іх, Божая сіла:
Менш – што гэтак раблю,
Больш – за тое, што гэтак пішу!

Народжаны для шыбеніцы ў вадзе не патоне

Захлынуцца не кожнаму дадзена
Да пяшчоты ў адчайным рыўку...
Надзея Салодкая

Гаварыла калісь
Мая дзядзіна:
– У наступным
Упэўненай будзь:
Захлынуцца
Не кожнаму дадзена –
Хтось на шыбеніцы
Скончыць пуць.

Добра, што вершаў мала!..

Гэта добра, што вершаў так мала...
Людміла Сіманёнак

Гэта добра,
Што вершаў так мала...
А страчыла ж калісьці –
З пляча!..
Я з гадамі
Дабрэйшаю стала:
Менш пішу –
Менш цвялю чытача.

Транты

Замерлі кінутыя транты,
І тры рублі савецкіх грошай,
А дзесьці мышы-эмігранты
Сняць сны аб роднае раскошы.
Людміла Сіманёнак

Ператрасаўшы
Неяк транты,
Знайшла рубель
Савецкіх грошай –
Прыкідваць стала
Варыянты:
Выходзіць, што жыла
Ў раскошы!..

Тост

Давайте выпьем имерули,
чтоб мирно жили мы всегда!
… Давайте выпьем цинандали
за матерей и жен своих!
… Давайте выпьем гурджаани
за справедливость и добро!
… Давайте выпьем саперави
за радость дружбы и любви!
Давід Сімановіч

П’ём, каб мы роднае старонкі
Больш не гублялі адчуцця!
Давайце вып’ем самагонкі
Ды за цвярозы лад жыцця!

Рыбакі

Но взгляд отводит он в сторонку,
сжимая удочку в руке,
когда соседские девчонки
снимают платье на песке…
Давід Сімановіч

Каб, рыбакі,
Вас чэрці елі!
Адно на думцы,
Акурат:
На паплаўкі б
Вы ўсё глядзелі –
Не на распраненых
Дзяўчат!..