КАРАЦЕЙ КАЖУЧЫ

Адзіны сродак унікнуць смерці – жыць.

Адным многа даецца, а другія многа бяруць самі.

Акселерацыя: яшчэ матчына малако на вуснах не абсохла, а ўжо не абсыхае піва.

Амперметр – фізік Ампер у дзяцінстве.

А навошта казаць „гоп”, калі ўжо пераскочыў?

Апошні крык моды: – Дзень добры, я вярнулася!

Асноўны недахоп грошай – іх заўсёдная нястача.

А ці беражэ Бог беражонага атэіста?

А ці варта вучыцца на памылках? Мо, танней бы абышлося вучэнне на правільных рашэннях?

Бакалаўр сексуальных навук.

– Беражонага і Бог беражэ, – сказаў чорт, застрахаваўшы сваё жыццё.

Беражы здароўе – яно спатрэбіцца хваробам!

Больш іншых ускладняюць жыццё прасцейшыя.

Броўнаўскі рух – шлях сэра Броўна з бара дадому.

Брыль ламаў шапку перад капелюшом.

Быў адналюбам – любіў аднаго сябе.

Бяззубы пацыент меў зуб на дантыста.

Вадалаз выглядаў як у ваду апушчаны.

Варона пракаркала сваю лебядзіную песню.

Ведае сабе цану, але ж так любіць патаргавацца!..

Вецер у галаве, кажаце? Затое думкі на скразняку – заўсёды свежыя.

Вопытны выйдзе з безнадзейнай сітуацыі, абачлівы ў яе не патрапіць.

Выйшаў з сябе і прапаў без звестак.

Вядома, што ў Снягурачкі ёсць дзядуля – Дзед Мароз. А хто яе бацька? Ці не Снежны Чалавек, які хаваецца ад аліментаў у Гімалаях?..

Вязальшчык не вязаў лыка.

Галодныя кішкі марш іграюць, а якую мелодыю выконваюць сытыя?

Гатовы зрабіць усё, каб нічога не рабіць.

Гледачы былі узяты ў палон пераўзыходзячымі сіламі артыстаў.

Глупства ў свеце распадзелена больш справядліва, чым розум. Скардзяцца на недахоп розуму, але ніхто – на недахоп глупства.

Гультай любіў работу, але толькі – платанічна.

 1  2 3 4 5 ... > ... >>